एक महिना केकीले किन फिल्म नखेल्ने ?

काठमाडौं । 'बितेका पल' सिनेमाको सुटिङ सकाएर राजधानी फर्किएकी केकी अधिकारीले एक महिना नयाँ प्रोजेक्टमा काम नगर्ने भएकी छिन् । एमबीएको परीक्षा भएकोले आफूले त्यसैको तयारीमा समय खर्चिने हुँदा सिनेमा क्षेत्रका कसैको पनि फोन नउठाई बसिरहेको उनले बताइन् ।

केकी प्रसिडेन्सियल कलेजमा एमबीए पहिलो सेमेष्टरमा अध्ययनरत छिन् । पहिलो सेमेष्टरको मिड टर्म परीक्षा २१ माघदेखि शुरु हुँदै छ । अध्ययनशील नायिकामा पर्ने केकी आफ्नो लागि अहिले करियरभन्दा पढाइ महत्वपूर्ण भएकोले सिनेमाबाटा ब्रेक लिएको बताउँछिन् । 'थुप्रै कलहरु आइरहेको छ, तर मैले वास्ता नगरी पढाइमै ध्यान दिइरहेको छु,' उनले भनिन् ।

पढाइले करियरमा दीर्घकालीन असर पर्ने उनको विचार छ । 'आइएम सरी'लगायतका सिनेमामा काम गरिसकेकी केकी आफू कम तर स्तरीय सिनेमा मात्रै खेल्ने बताउँछिन् । भन्छिन्, 'रेष्ट गर्दे काम गर्नुको मज्जा नै बेग्लै हुन्छ ।'