निश्चलले कमेडी सिनेमा निर्देशन गर्ने

काठमाडौं । युवा निर्देशक निश्चल बस्नेतले अब कमेडी शैलीको सिनेमा निर्देशन गर्ने भएका छन् । व्यवसायिक रुपमा सफल चलचित्र 'लुट' निर्देशन गरिसकेका बस्नेतले अबको तीन महिनामा कमेडी सिनेमाको छायांकन शुरु गर्ने लक्ष्य लिएका छन् । 'सबै कुरा आफूले सोचेको जस्तो त हुँदैन । तर लक्ष्य भने तीन महिनामा शुरु गर्ने लिएको छु ।

उनी अहिले आफ्नो दोस्रो सिनेमाको पटकथा सम्पादन र छलफल गरिरहेका छन् । कलाकार छान्ने, सिनेमाको नाम जुराउने काम अझै बाँकी नै छ । 'लुट'लाई कतिपयले छाडा भनेर आलोचना गरेपनि आफ्नो पछिल्लो सिनेमा भने पारिवारिक हुने उनले बताए । 'सबैलाई हँसाउने जमर्को गर्ने हुँदा यो पारिवारिक सिनेमा हुनेछ,' निश्चलले भने ।

नेपाली सिनेमा उद्योगमा संकटकाल लगाउने तयारी भईरहेको बेला 'लुट'ले त्यो अवस्था टारिदिएको थियो । अहिले पनि नेपाली सिनेमाको व्यापार निरन्तर खस्कँदो अवस्थामा छ । त्यसैले पनि निश्चलको नयाँ प्रोजेक्टलाई धेरैका लागि अर्थपूर्ण हुने ठानिएको छ ।