बोर्ड अध्यक्षका लागि रेखाको फेसबुके बहस

काठमाडौं । एकातिर एकजना निर्देशक बोर्ड अध्यक्ष नियुक्तिको विषयलाई लिएर आमरण अनशनमा छन् भने अर्कातिर अध्यक्षकै दाबेदारी भनिएकी नायिका रेखा थापा फेसबुक बहसमा उत्रिएकी छिन् ।

अध्यक्ष बन्नका लागि प्रधान्मन्त्री बाबुराम भट्टराईदेखि एकीकृत नेकपा माओवादीका अध्यक्ष पुष्पकमल दाहाल 'प्रचण्ड'लाई समेत भेटिसकेकी रेखाले एकजना निर्माताको नाम अध्यक्षका लागि आएपछि फेसबुकमा प्रतिक्रिया दिएकी हुन् ।

निर्माता रमेश संवेदनाले बोर्डले फिल्म सिटी बनाउने योजनासहितको बायोडाटा बु्झाएर अध्यक्ष बन्ने कसरत गरेका थिए । त्यसप्रति रेखाले लेखेकी छिन्, 'विकास सोचले हुन्छ । उमेरले होइन । हाम्रो क्षेत्रका मान्छे नेता हुने गुणका छन् । ५० वर्षमा एउटा फिल्म बनाउँछन् अनि वरिष्ठ रे । हामी त अझ २० वर्षसम्म बालकबालिका नै हुने भयौं ।'

चलचित्र क्षेत्रको मान्छे आउँदा विरोध गर्ने र त्यसबाहिरका मान्छे आउँदा मौन रहने नेपाली कलाकारहरुको बानीले सिनेमा उद्योग पछाडि परेको पनि उनको धारणा छ । रेखा निकटका निर्देशक सुरेशदर्पण पोखरेलले रेखाको कुरालाई समर्थन गरेका छन् । उनले रेखालाई नेपाली चलचित्र क्षेत्र नबुझेको भनिएपनि अन्ततः चलचित्र क्षेत्र प्रगतितर्फ लम्कने बताएका छन् । लगत्तै रेखाले खुशी व्यक्त गर्दै ६ महनापछि नेपाली चलचित्रमा सुधार आउने आशा पोखेकी छिन् ।