कालोसूचिबारे केही थाहा छैनः विपना

काठमाडौं । तीन महिना अघि ऋण असुली न्यायधिकरणमा आफू विरुद्ध परेको मुद्दाबारे कुनै जानकारी नभएको नायिका विपना थापाले बताएकी छिन् । ११ साउनमा विपनाले बारम्बार ताकेता गर्दा पनि गाडी खरिदका लागि लगेको ऋण नतिरेको भन्दै नारायणी फाइनान्सले मुद्दा दर्ता गराएको थियो ।

फाइनान्सले ७ लाख २६ हजार सात सय ८० रुपिया दाबी गरेको छ । तर यसबारे आफूलाई कुनै पनि खालको सूचना नआएको विपनाले जिकिर गरिन् । 'भाइले म नेपाल आउनसाथ सुनाएको थियो । त्यसमा मैले केही पनि बुझ्न पाएकी छैन,' उनले भनिन्, 'पूर्णता अनविज्ञ छु ।'

जमानाकी चर्चित नायिका विपना भारतीय नागरिकसँग विवाह गरेर उतै बस्छिन् । दशैं मान्न नेपाल आएकी उनी अझै दुई महिना यतै रहनेछिन् । तिहार मनाएर यसबारेमा विस्तृत बुझ्ने उनले बताइन् । 'यसबारेमा अहिले म केही पनि भन्दिनँ,' विपनाले भनिन् । विपनाले १७ जेठ २०६२ मा फाइनान्सबाट ऋण लगेको उजुरीमा उल्लेख छ ।

पाँच वर्षअघि नै फाइनान्सलाई आफूले गाडी लैजान भनेको विपनाले बताइन् । 'त्यतिबेला किन लगेनन् र अहिले किन लगे थाहा छैन,' उनको भनाइ छ । फाइनान्सको स्वामित्व समेत फेरिएको आफूले सुनेको उनी बताउँछिन् । ऋण चुक्ता नगरेकोबारे समेत उनले बुझेर मात्रै प्रतिक्रिया दिने बताइन् ।

विपनाले करिब डेढ सय नेपाली सिनेमामा अभिनय गरेकी छिन् । तर विवाहपश्चान भने उनले माइतीको सिनेमा उद्योगलाई लगभग माया मारेकी छिन् । विवाहसँगै फिल्मी करियरबाट समेत टाढिएकी विपना तीन महिनाअघि खराब ऋणीको रुपमा सार्वजनिक भइन् । माइतीमा लागेको दागलाई विपनाले कसरी मेटाउने छिन् ? तिहारलगत्तै यसबारेमा छिनाफानो हुने आशा छ ।