पानीको थोपा छातीमा झर्दा गीत रचिन् रेखाले

काठमाडौं । भनिन्छ, कुनै पनि सिर्जनाका पछाडि केही न केही घटनाजन्य कारणहरु लुकेका हुन्छन् । यस्तै झरीको एउटा घटनाले नायिका रेखा थापलाई गीत लेख्न प्रेरित गर्‍यो रे । दर्काने असारे झरी वषिर्रहेको बेला उनी कतै ओत लागिरहेकी थिइन् रे । त्यत्तिकैमा पानीको एउटा थोपा उनको छातीको भागमा तप्किएछ । 'तुप्लुक्क घाँटीभन्दा तल्लो भागमा झरेको त्यो पानीको थोपाले मलाई असाध्यै आनन्द पो दियो,' रेखाले ती दिन सम्झिन्, 'म पनि मसक्क मस्किएको त्यो पल अहिले पनि गज्जबको लाग्छ ।'

अनि यो घटनाले उनलाई गीतकार पो बनाइदिएछ । त्यसलगत्तै घर फर्किएर रेखाले एउटा सुन्दर गीत नै रचिन्, 'पानी पनि कस्तो बैमानी छ झरिदिन्छ कहाँ कहाँ, कहिले मनको मीत बनेर, कहिले मीठो प्रीत बनेर ।'

रेखाले यो गीत अब बन्ने आफ्नो सिनेमामा समेत राख्ने योजना बनाएकी छिन् । संभवतः आफैंले यो गीतमा स्वर दिने समेत उनले बताइन् । आफू गीतकार नभएपनि कहिलेकाहीं परिस्थितिले जन्माएको भावलाई गीतमा उतार्ने गरेको रेखाको भनाइ छ । उनले यसरी केही थान गीत लेखेकी छिन् ।

आफूलाई झरी पर्दा रमाइलो लाग्ने हुँदा गीत जन्मिएको उनी बताउँछिन् । लगातार फिल्मको सुटिङ हँदाका दिनबाहेक उनलाई पानी पर्दा कहिल्यै बोर लागेन । कतिसम्म भने उनले एकपटक साथीभाइसँग घरको छतमा भेला भएर पानीमा भिजेर रमाइलो गरेकी थिइन् । 'साथी भए अहिले पनि म रुझ्न मन लाग्छ,' रेखाले थपिन् ।