परोपकारतिर झरना

काठमाडौं । कलाकारहरु मनोरञ्जन र ग्ल्यामरसको दुनियाँबाहेक केही पनि देख्दैनन् भन्ने भ्रमलाई चिर्ने अवसर पाएकी छिन्, नायिका झरना थापाले । दक्षिण कोरियाको अन्तराष्ट्रिय स्वंयसेवी संस्था मान्नामले सद्ध्भावना दूत बनाएपछि झरनालाई यस्तो बाटो खुलेको हो । ‘कलाकारहरु तामझाम र बिलासी जीवनमात्रै बिताउँदैनन्, समाज सेवामा समेत उत्तिकै दख्खल राख्छन् भन्ने सन्देश दिन चाहन्छु,’ उनले भनेकी छिन् ।

सामाजिक उपेक्षामा परेका व्यक्तिलाई मान्नामले विश्वका विभिन्न देशमा सहयोग पुर्‍याउने गर्छ । चाँडै नेपालमा समेत यसको कार्यालय खोलेर काम थालिने संस्थाले जनाएको छ । आफू अभिनित फिल्म ‘फेसबुक’को प्रबद्र्धनका लागि दक्षिण कोरिया पुगेकी झरनालाई मान्माकी अध्यक्ष किम नाम हीले सद्ध्भावना दूतको प्रमाणपत्र दिएकी छिन् । नेपालजस्तो देशका लागि मान्नामको सहयोगले धेरै राम्रो काम गर्न सकिने थापाले बताइन् ।