नरेशलाई कलाकार छान्न धौधौ

काठमाडौं । निर्देशक नरेश पौड्याल आफ्नो पछिल्लो सिनेमा 'स्विट ड्रिम्स'का लागि कलाकार नपाएर केही दबाबमा छन् । केही समयअघि आर्यन सिग्देल र प्रियंका कार्कीले अभिनय गर्ने खबर सार्वजनिक भएको थियो । 'कुराकानी मात्रै भएको हो,' पौड्यालले भने,'फाइनल भएको छैन । प्रायः सबैसँग कुरा गरिसकियो तर टुंगोमा पुग्न सकिएन ।'

पाँच दर्जनभन्दा बढी कलाकारसँग कुरा गर्दा पनि निष्कर्षमा पुग्न नसकिएको उनले बताएका छन् । 'कलाकारको डेट र रेट मिल्नुपर्‍यो,' नरेशले भने, 'उनीहरुको नाम मात्रै चलेर भएन फिल्म पनि चल्नुपर्‍यो ।'

'स्विट ड्रिम्स' अत्याधुनिक सहरी परिवेशमा हुर्किएका प्रेम जोडीहरुको आकांक्षा बताउने फिल्म भएको नरेशको भनाई छ । यो चलचित्रमा दुई जोडी कलेज विद्यार्थीका सपना समय परिस्थितिले कुन मोडमा पुग्छ भन्ने देखाइने छ । 'सबैले राम्रै गरुँ भन्ने सपना बोकेका हुन्छन् तर कसैको परिस्थिति अनुकूल हुन्छ कसैको हुँदैन । यही कुरा फिल्ममा देखाउँछु,' उनी भन्छन् ।

एउटा प्रेम जोडीको सपना पूरा हुने र अर्कोको नहुने तुलनात्मक दृश्य फिल्ममा हेर्न सकिने छ । 'तर कलाकार छान्नै समय लागेर आफ्नै सपना पो तुहिने हो कि !' ठट्यौली गर्दै उनले भने । भदौको दोस्रो हप्तादेखि फिल्मको सुटिङ थालिने पौड्यालको योजना छ । ४५ देखि ५० लाखको लगानीमा निर्माण हुन लागिरहेको 'स्विट ड्रिम्स' उनको दशौं फिल्म हो ।