काली भए पनि हिस्सी परेकी छु: ऋचा घिमिरे

कालीकाली हिस्सी परेकी नायिका ऋचा घिमिरे पुतलीसडकस्थित ‘बिजीबी इन्टरटेनमेन्ट’ मा भेटिइन् शुक्रबार विहान । दाहिने हातमा हरिया चुरा टम्मै तर आधुनिक पहिरनमा रहेको ऋचा डविङका साथै चलचित्रको ‘प्रमोशन’ पनि त्यहीँबाट गर्दैथिइन् । चलचित्र निर्देशक शंकर घिमिरेसँग झण्डै दुई वर्षअघि विवाह गरेकी नायिका ऋचाले त्यसपछिका दिनमा अन्य व्यानरका तीनवटा मात्र फिल्न खेलिन् । र्‍याम्प मोडलिङबाट कलाक्षेत्रमा प्रवेश गरेकी ऋचाले ‘तिम्रो माया ९९ सय मेरो माया सय’ बाट नेपाली चलचित्रमा प्रवेश गरेकी हुन् । बिष, वीरताको चिनो, तुलसीजस्ता होमप्रोडक्सन चलचित्रमा अभिनय गरेकी ऋचासँग गरिएको सङ्क्षिप्त संवाद-

तपाई कलाकार कि निर्मात्री ?
कलाकार नै हो । सुटिङस्पटमा पनि म निर्मात्रीजस्तो हुँदैहुन्न । मेरो व्यवहार कलाकारकै रुपमा हुन्छ ।

श्रीमान् निर्देशक भएपछि चलचित्र खेल्नचाहिँ समस्या भएन हैन ?
त्यस्तो होइन, राम्रो कलाकार घरमा छ भने किन नखेल्ने भनेर उहाँले (श्रीमान्) नै भन्नुहुन्छ ।

श्रीमान्सँग कतिको झगडा पर्छ ?
पर्दैन, एउटै क्षेत्रको भएकाले झगडाभन्दा सहयोग बढी हुन्छ ।

काममा सघाउनुहुन्छ ?
कुनै पनि काममा एकआपसमा सल्लाह गरेर नै निकास खोज्छौं ।

कि निर्देशनतिरै जाने योजना छ ?
अहिले हैन । पाँच वर्षपछि निर्देशनतिरै जान्छु ।

श्रीमानले एकदम माया गरेर बोलाउँदा के भन्नुहुन्छ ?
‘कालू’ भन्नुहुन्छ ।

काली भएकोमा कुनै गुनासो ?
त्यस्तो केही छैन, काली भएपनि हिस्सी परेकी छु नि !

नायिकाहरु त गाउनतिर लागे नि ? तपाई पनि ?
गाउनका लागि धेरै साधना चाहिन्छ । त्यतातिर जान्न । घरको गायिका मात्र बन्ने । गीतचाहिँ खुव सुन्न मन लाग्छ ।

कसको गीत बढी सुन्नुहुन्छ ?
कर्णदास र सत्य-स्वरुपको ।

अरुले थाहा नपाएको तपाईको बानी ?
ऐना बढी हेर्ने । मोवाइलमा पनि ऐना नै हेरिरहन्छु ।

दिनमा कतिपटक ?
गनेको छैन ।

उसोभए नक्कली ?
खै ! नक्कली नै होला । तर मेकअपचाहिँ गर्दिन ।

मैले सोध्न छुटाएको प्रश्न ?
मेरो चलचित्र ‘ब्रेकफेल’ । पूर्ण मनोरञ्जनात्मक, लाइभ कमेडी चलचित्र ब्रेकफेल भदौ १६ गतेदेखि देशभर प्रदर्शनमा आउँदै छ । लोकेशन नयाँ छ, मेहनत पनि धेरै गरेका छौं । दर्शकले मूल्याङ्कन गरिदिनुहोस् ।

कस्तो छ यो चलचित्र ?
ग्ल्यामरस, स्टाइलिस् फिल्म हो । सुदूरपश्चिमको नयाँ लोकेशन । तर, भद्दा प्रस्तुति छैन । पूर्ण मनोरञ्जन ।